Poesie scelte edite ed inedite in dialetto friulano

Di Ermes di Colloredo,
con aggiunte di Pietro Zorutti
Udine, pei fratelli Mattiuzzi, 1828

(Biblioteca Nazionale Braidense - 18.23.F.22-23)

pag. 8

Vasti preparamenti di guerra fatti dal Turco contro la Maestà di Leopoldo Imperatore.
Si augura e si presagisce vittoria all' armi di Sua Maestà Cesarea.

ODE

SPONTAVE dal levant
La vanguardie dal di, l' albe novele,
E in un istess istant
Sparive in cil al so aparì ogni stele;
Nè luminòs mai tant,
Nè plui lucid, nè mai plui risplendent
Apolo issi dal Gange in orïent:
Quand eco, oh gran stupor !
Pizzul globo di nul alze a un moment
Nembo, che cun teror
Strepitòs ad ognun puarte spavent:
La tiare emple d'orror,
Il cil par dut amante di corot,
E in faze al Dio di Delo appar la gnot.
Strisse il lamp, e dà il fuuc
E' bombarde dal cil, e al lamp suced
Subit il ton, e in luuc
Mist d' umid e di chiald e d'ajar fred
La conzele chel sûc
Che Febo atrai de tiare, e in mud costipe,
Che lu regno di Cerere dissipe.
Cussì, Signor, jò miri,
O mi pàr di vedè, che al levant
Torbide lune ziri,
E atrai d' un gran vapor l' umor pecant;
L' Unno ribel, che aspiri
A libertat, e il Turc, che Marte inflame,
Sichè a l' Austrie manazze e fuuc e flame:
Di mil squadris gran chiamp,
Un marzïal diluvi inonde il plan
Tarlupe ormai lu lamp
De curve scimitare al Trace in man:
A la muart no l' è schiamp,
D' armis a un tal torent no l' è ripar,
Ma ce torrent? è di milizie un mar.
De formidabil trombe
De fame veritiere il rauc fragor
Par l' Europe ribombe,
E di un tant aparat puarte il teror:
Torni omai la colombe,
Puarti l' ulif, e quintri i Munsulmans
Viòdinsi unìz un dì Princips cristians:
Ma sol in chiamp apar
Il gran Leopoldo, il clement, il just,
E sol armat compàr.
Di squadrons aguerìz fuart e robust
Tu sol alzis ripàr
Gran Monarchie da l' Istro: ah! non temè,
Che se ben sol, il cil leghe ha cun te.
Tiran usurpator
Che tente rinovà di Soliman
L' antic insult, e al flor
De Germanie puartà strazio inuman
Ti ramenti, o Signor,
Che in vez dai tiei antenaz, e di tant chiamp
A l' Austrïaco ardor servin d' inciamp
Il Raab, il Raab ti sveli
Che spetator fo dal valor cristian,
E chel a te riveli
Qual plaje fe a Macon brand Aleman;
Chel Raab a te sèi spieli,
Che di sanc Maometan sglonf e crissut
Ad Anfitrite in sen puartà tribut.
In tant l' empio Macon
Rabie e furor in pet spire al Sultan
Colegat a Pluton;
Radune l' Asie e il popul African
De turche trombe al son:
Plen di fast circondat il fier Circass
D' inumerabil turbe avanze il pass.
Ma qual il cil destine
Ai doi grang chiamps prospere o ree fortune?
Qual vitorie o rüine
Prepare a l'Austrie, o a l' Otomane lune?
la me Clio l' indovine;
Presagiss rimirand propizie stele,
E cun sermon veràz cussì favele:
La grand' Austriache plante
Produtrice d' erois, cepo imortal,
Difind il gran Tonante,
Ne fulmin tem l' aloro imperïal
A Dio dilete, e sante
Ten lassù coronàz d' eterne glorie
Mil campions preparàz a la vitorie.
Al glorïos ered
Dal prin Alberto al gran Leopoldo invit
Zà prepare e conced
Il trionfo imortal al gran conflit.
Ormai in cil è scrit
La sentenze fatal, e ormai s'imbrune,
Di mortifar squalor la Tracie lune.
Ed eco da lontan
Marchie il barbar esercit in distanze;
Gran front distind sul plan,
E a l'us Turchese falcade è l'ordinanze:
Ma il bon chiamp cristian,
Benchè in numar di assai resti inferior,
Avanze in discipline ed in valor.
Leopoldo i siei campions
In dos lineis compart cussì planc planc;
Ha in miez ju batajons
De fantarie, e i cavalirs al flanc;
Tramezat di canons
Ha lis squadris, e al flanc dai cavalirs
Dragons, Ongiars, Cröàz e Venturirs;
Radople l' ordinanze
La retroguardie cun pompose mostre,
Ma tu, o gran Re di Franze
Di mil squadris armat, tu belicos
Staras a tal tragedie neghitos?
Mire il barbar feroz,
Che qual mastin rabios e d' ire ardent,
S'inchiamine veloz,
E poc acquist l' Europe è al gran intent.
Al spetacul atroz,
Primogenit dal popul batïat
Tu saràs spetator e al cil ingrat?
A sintì chel che al dìs
Dal cil il to Gofredo, e cun rossor
L'indovine e predìs
Anchie de to fortune il ver tenor:
Tu vedaràs, Signor,
In te' Senne e in ta 'l Rodan un dì fuars
L' Arabo curidor a tufà il muars
Ma pizzul spazzi omai
Reste fra un chiamp e l' altri al gran ciment;
E pedons e chiavai,
Al ceno imperïal ognun sta atent
Marte si mostre omai,
E al rimbombà dal concavo metal
Trèmin il cil, la tiare, il mont, la val
I1 drapel coragiòs
De vanguardie il nemì sfide a la pugne
Cul ceno e cu la vos
Ecite il coridor, e il fiar impugne.
In trono mäestòs
Compàr la muart, ed eco in un moment
Dut fuuc, dut flame, e dut sanc e spavent.
Dan fuuc lis bombardis,
E il canon dut fracasse e puarte al vint
Chiavai e cavalirs,
Giambis, braz, chias e busg, dut indistint;
No dà luuc ai pinsirs,
Nè manco dal murì: e il colp fatal
Sbrane in piez l' om prime che al sinti il mal.
L' un cun l' altri squadron
Si acozze, e qual tempieste in bosc fronzut
Puartade dal sïon,
In momenz lu disfronde e reste nut.
Tal sore ogni campion
Svole il plomb, e dut chiad volte e rüine
Nè si viod ordin plui, nè discipline,
Il grand fì di Macon
Plen di rabie e furor passe indevant,
E qual folc dopo il ton
Fore, spezze in cent lucs in un istant
Leopoldo a lui s' opon;
Or cui qual gnuf Giosuè ferme il soreli,
Che a l'eroiche tenzon servi di spieli.
Qual gnot plene d'oror
Cupo silenzio ingombre in un moment,
Cussi plen di stupor
Si ferme ogni guerir al gran portent.
Il belicòs fragor
Cesse de trombe, e stupid ognun tàs,
Par il campo di Marte è il chiamp di pas.
Chei erois glorïòs
S' incontrin, e il Circass d' un gran fendent
Leopoldo coragiòs
Urte e colpiss; ma chest è al colp atent,
E cun prodigïòs
Ardiment il Pagan feriss al flanc,
E de feride il colp mostre lu sanc.
Alzin grido improvìs,
E mil vos dan aplauso al feritor;
Ma i Barbars inimìs
Ecite a la vendete un just rossor:
Si divulghe l' avìs;
Torne il conflit e l' odi e l' ardiment
Familiar rind de muart ogni spavent:
Alfin ced il Pagan;
Viod oribil di muarz e di languenz
Dut semenat il plan,
E par dut cori il sanc quasi a torenz:
Pur cun furor insan
Rincore i siei, ma invan, e viod dut strac,
Che quintri il cil ogni valor è flac.
Leopoldo a la to glorie
Assist il grand Idìo simpri presint;
Gridi il to chiamp vitorie,
E l' Aquile imperial si spieghi al vint;
Sei funeste memorie
Al Gianizzer felon l'Arabo lari,
E a riveriti ogni Monarchie impari.



Dichiarazione di affetto all'amante.

SONETTO

A te, dal miò pinsir e dal miò cuur
Sole speranze, mandi chest Sunet,
Cun dì, che ti ten simpri in miez dal pet,
E che simpri di sta tu ses sïùr.

Sta la me fede salde come un mûr,
In compagnie d'un grand e bon afiet,
E d'ogni triste sorte al brut dispiet
Sarà di me l'amor costant e pûr.

Tu di risquintri ses lu miò mador,
E prei chel che l'ha fat in cil lis stelis,
Che al ti tegni lontan d'ogni malor.

Vòi simpri domandant di te novelis,
E se 'o sint a contà qualchi rumor,
Si fàs di te pensand il cuur in stielis.



CANZONE CINGARESCA PER NOZZE

E' un arbolat cu dìs
Che da l'otantesis
Si ha di vedè

Chiossis, che han di apparè,
E fa stupì duquang,
Ju pizzui e ju grang
Umin dal mont.

Custui al fàs un cont,
Che senze dà spavent
Si vedarà un portent
Tas bestïal.

Si ha di vedè un nemal
Cu è tra il nibli e il zuss,
Ma l'ha un poc di catuss
Ta 'l cimïà.

Chest si ha di maridà,
E chioli une polzete
Di etat un poc provete
Di agn cinquante.

Tante legrezze e tante
Si sint in chel päìs,
E par che ognun al dìs
No vedè l'ore

Di vedè che' Signore
A splumà chel ucïel,
Che par no jessi biel
E' i dìsin Cuc.

Chest püar mamaluc
Al ha tant sgiarpedat,
Che alfin al ha chiatat
Dulà fa nìt

E cussì speluchìt
A' dìsin che al ul fa
Stupì dut Chiäurià
In tes sos gnozzis.

Di zà si emplin lis cozzis,
S'infòndin ju butaz,
Ai chiapons e dindiaz
Si tire il quel.

Sarà scrove o purciel,
Chialzons penz quatri dez,
Cu faran tirà pez
Tai cu chialderiis.

Sarà po un zei di bueriis,
Balotis a la fin
Cun dal formadi asìn,
E de cajostre.

Si farà po une giostre
Tra quatri giostradors,
Che fra dug i signors
Vadin ator.

Panfilo il prin cu cor,
Bruse e Napolitan,
E i tre presinz saran
Come sta il pat.

Il prin sarà un comat,
Sëond un frëulir
Par ultin il braghir
Sarà di Bruse.

E dopo, come si use,
E' si farà un balet
Devant cu vadi in jet
Il sior nuviz.

Al lusor di tre stiz
Comparirà Catin,
Vistude di turchin
In t'une zaje.

La done di Zagaje
Cun un ufiel in man
Cume un flor mantöan
Sarà seonde.

La tiarze biele e monde
Sarà la Macarine,
Che par patì di urine
E' va in barele.

L'ultime la Chiargnele
Zà morose dal spos
Vignarà di nascos
In t'une scemple.

Dopo vè dade l'emple
Ognune al so sachet,
Si farà po il balet
Des quatri damis.

Al lusor di tre flamis
Di selëar ardint,
Fasind slargià la int
Compariran.

E chestis è saran
Su di un chiar trïonfal
Cuviart di sorëal
Cun tre aradors:

E chesg saran signors
I prins di chel consei,
Che han sore j' ufiei
Il magistrat.

Dopo vè ben laudat
La nuvizze e il nuviz
Plovaran pitiniz
Par ogni bande.

Un'armonie ben grande
Par dut si sintirà,
Che calisson sarà
E sivilot;

Chè tochiat un biel bot
In franzese maniere,
Farà che fin a sere
Al duri il chiant.

No sai se par inchiant
Si sintarà dal cil,
Vignind in ta 'l curtil
Un gran rumor.

Rapresentand Amor
Sarà Napoli nud
Su un côl di palud
Bendat ju voi.

E sfracujand pedoi,
Träind e pêz e ruz
Farà restà dug muz
Di maravee.

Tacat a une coree
E pendolant dabass
In luuc dal so turcass
Varà un codar.

E cun ponte d'azzar
Il stombli in pîd di frezze
Tacat a une chiavezze
A lung pëat.

Chest amorin garbat
Sarà bendat ju voi
Cun un cenglon ben vieri,
Cu fo di missar Pieri
Il carozzìr.



Contro il simulatore

SONETTO

NO, che 'o no crederai e' to finzion,
Perfid adulator: al è un gran mat
Chel cu ti crod, savind di propri fat,
Che il ver a la to bochie no sa bon.

Tu sflochis plui bausiis in conclusion,
Che no son i chiavei dal to chiavat;
Zure che Giove sei ta 'l cil stelat,
Jo fede no t'in dòi , ta 'l dìs da bon.

Cimud si puedial crodi par veraz
Dut chel che in ta 'l to cuur tu te squindut,
Se dut chel che tu mostris è falaz?

E cui ustu cu crodi al to esponut,
Se il tasè stess l'è simpri in te mendaz,
E anchie tasind, tu ta 'l mentiss di dut?



Compagnia di amici in Guriz per il giorno di san Martino.

SONETTO

MANDI Tocai lu so netar fervent,
Tributi a no lu Pelachj il licant,
Dèi Siracuse il so licor potent,
Spagne lu generòs bon Alicant.

L'odoròs Mont-alcin clar, risplendent,
Bergum mandi il so Sant dolz e picant,
Doni Vicenze il Marzemin recent,
Lu Frïul il Prossec cu puarte il vant.

Che in compagnie di cheste zovintut
Uei che de nestre sêt smorzìn la pizze,
Bevind de me morose a la salut.

Sarà la bocalete la nuvizze,
E no' la bussarìn ogni minut,
E des lodris farìn po une pilizze.



Risposta dell'Autore a nome del Signor Agostino N.N. al Signor Carlo N.N. come nuovo Poeta.

CANZONE

CUMÒ sì, che impari a vivi,
A vedè che un cavalir
Di pöete ul fa il mistir,
E no 'l sa nè lei, nè scrivi.

Cheste chiosse sta di fat,
Che vo ciart no avès studiat,
E tant poc anchie imparat;
Ergo dunque vo ses mat.

A lafè che jè ridicule
Cheste uestre frenesìe,
Jò us viod, fradi, a là vie,
E' plui lunge, in te canicule.

E se a cas dìs alc di biel,
No' savìn , che al ven de man
Di chel mestri Grazian,
Cu murì senze cerviel.

In chel uestri biel racont,
Cu no dìs nuje di ver,
Jò faveli da sincer,
E fàs zudis dut il mont.

No saveso, che in Parnas
E no entràrin mai minchions;
Cun chei uestris petolons,
Ce che ocor dami dal nas?

Chei stramboz che simpri fais,
Cun chei viars di mussulin,
Un lunc lunc, l'altri tantin,
Che in strizzassi ju zonchiàis.

Vo dais titul di chianzon
A chei uestris madrigai,
Dìi pur miardis di giai,
Cu no puzzin, nè sàn bon.

Ma sintìmi in fè d'onor,
Che us uei dà un bon consei:
Làit al pascul cui purciei,
Che sarès bon rimador.

E se in fa qualchi viarset,
Vo chiatais qualchi tartufule,
Us olìn lëà a la bufule
Di chianaipe un biel lazzet.

Za savin che in ta 'l dì mal,
Vo riussìs ben par nature;
Lèis ai altris la venture
Par no piardi il chiavedal.

Ma sintìmi, chiar Paron,
Cul pensà di scrivi ben,
E stimassi un biel inzen,
Mi servìs just'di bufon.

Veramentri gran vivezze
Ha che uestre chianzonete;
Chialait là ce biel pöete
Di menà a bevi in chiavezze!

Ce biei viars faz a la mode,
Cu no valin doi pistacs,
Sònai viars, o pur madracs,
Che no han nè chiaf, nè code?

Ce mistir che volès fà!
Seso mat o inspiritat?
Ma se ses mal intopat,
Faisi al manco sconzurà.

O Signor, se olès savè
La biel'art dal pöetà,
Imparait a cuminà,
E po a scrivi l'Abecè.

Chest non è mistir d'alocs;
Se scrivessis dut un an,
Mai pöete us stimaran,
Ma plui prest un sclape-zocs.

Ma lassìn pur là da part
Chestis flabis, e uei dì
Se volès stami a sintì
Senze burlis e senze art.

Non è part di cavalir
Il dì mal di chest e chel;
E seben vès poc cerviel,
Tralassait pur chest mistir.

Chei proverbis cussì soz
In che uestre chianzonete;
Lafè nanchie un frut di tete
No diress di tai stramboz.

Ma sintìmi, us al dìs planc,
Par uarì di chest umor,
Faisi fa pur un stretor,
E giavà ben ben dal sanc.

Se il furor po us inflame,
Vo podès chest mes d'avost,
Imparand a uestri cost,
Refreschiassi cu la grame.

E se pur us covente alc,
Tochià il pols, vedè l'urine,
O frëà la paladine,
Mandarai lu marescalc.

E cun chest us uei lassà;
Che sòi stuf di vo e di me:
Nè us uei nanchie ringrazià,
Ma vo dimi gramarcè.



RINUNZIA ALL' AMORE DI FILLI

Al Sig. conte Federico di Zucco suo amico.

OTTAVE

DI chel toc di tiran, che al mi ha tignut
In servitut di amor, sòi liberat,
Fidrì miò chiar, Alfin, il cuur piardut
Daspò tant timp è in part ricuperàt:
Da l'eror che inzampai sòi ravedut,
E il pet 'o sint alquant refrigerat;
E siben che 'o mi sint qualchi punture,
Poc plui di un miez moment apene dure.

Di zà viod sul mostaz impalidit.
Tornami ross il sanc, vif il color;
Di zà si viod che il cuur è miez uarìt,
No sint plui de feride il gran dolor:
Qgnì suspir de bochie è zà smarit,
E zà dal sen bandit ogni brusor,
Ogni pene e torment hai mandat vie,
Ne sint plui un tantin di zelosie.

Da l'insidie di un sguard, dal tradiment,
Che, belezze crudel, simpri mi ordive,
Plui no paventi, no; di zà viod spent
Chel incendi amoròs che al cuur vignive,
Nè plui de Muse si udirà il concent,
Che par Fili laudà sechie è la pive:
Pur trop l'hai fat, ohimè! pa 'l timp passat,
Ma poc fo cognossut, anzi sprezzat.

La crudeltat e il trop sever tratà
Uaste di un cuur amant il ver afiet;
Che jè bastanze par podè smorzà
Chel fuuc, che pur e biel ard dentri il pet
E pur il dà torment, anzi il sprezzà
E quasi di ogni femine il difiet:
Maladete la razze! (e lu uei dì)
E cului che mai plui lis ul servì.

E sì che fasi pur chel che pò e sa;
Che sei simpri infedel, simpri vagant,
Che un plui costant di me no chiatarà
Se zire dal ponent sin al levant;
Anzi cul timp a' s' inaquarzarà
Ce che vul dì une femine incostant,
E pur trop vedarà la quintri-mine,
Che il timp va fabricand in so rüine.

Simpri no durarà sul so mostaz
Baldanzose la rose e il zessalmin;
Simpri no vedarìn spicà sul braz,
Pompe de so belezze il biel manin,
Parcè che 'o chiati scrìt sul miò libraz,
Che ogni biel in chest mond ha prest il fin;
E che sol la bontat, la cortesie
De stime e da l'amor aviarz la vie.

Tu sas, che al è gran timp, che 'o l'hai servide
Cun ogni fedeltat, anzi adorade:
Tu sas qual dal miò cuur fo la feride,
Che ogni chiosse cun te hai confidade.
Or che la volontat dute è pentide
Di vele fuur d'ogni reson amade,
Propon al cuur cun dut il so podè
Libar di vivi, e sta lontant di je.

E tu Fidrì, se par chiatif destin
In simil labarint tu vess di entrà,
Uarde ce che tu fàs, e pense al fin,
Nè in femine cu sei no ti fidà;
Che da l'esempli miò, quant sei meschin
Un om inamorat, si pò imparà:
Schiampe di chest malan; che in conclusion
La femine è un nemal senze rason.


© Biblioteca Nazionale Braidense - Sito Web: http://www.braidense.it
Via Brera 28 - 20121 Milano - Tel. +39 02 86460907 - Fax +39 02 72023910 - Email: info@braidense.it