Di Ermes di Colloredo,
con aggiunte di Pietro Zorutti
Udine, pei fratelli Mattiuzzi, 1828
(Biblioteca Nazionale Braidense - 18.23.F.22-23)
Pag. 11
Loda la bellezza di Polimia
SONETTO
Sì, che biele tu ses, e biele tant,
Che apene il cil a' ti fàs quintripont:
Se il cil di stelis recamat ha il mant,
Astris plui biei a te splendin in front.
Se in cil sponte il soreli, e dal levant
Luminòs si àlze a no' da l' orizont,
Dà la to gran beltat splendor plui grant
Tu soreli de tiare, albe dal mont.
Se mostre la vie latee il cil seren,
Fra il lateo cu disting doi montesei,
Plui candide la mostre il to biel sen.
Corit dug par stupor umin e Dei,
E amirarès in fazze dal miò ben
Epilogaz dug i planez plui biei.
Bella Donna per nome Maria.
CANZONE
IL to biel non mi rapresente un mar,
Marie, mar di belezze e di bontat;
E in un mar cussì biel il Dio bendat,
Par fa sclaf ogni cuur, l' è fat corsar.
Mar, che doi scois ha di alabastro in sen,
Di perle e di coral mostre un tesaur;
Mar che ha l' onde di lat e l' aghe d'aur;
Mar cu fàs spieli ad un biel cil seren,
E senze, parturì, l'aghe marine,
Beltat fatal, che in cil mostre il splendor,
Prodot ha chest biel mar cun plui stupor
Une beltat fra no' che pàr divine.
In chest mar naufragand contenz si muur
Se bëat il nochier, cu rive in puart,
In sì biel mar incenerit e muart,
Qual Fetonte chiadè, brame il miò cuur.
Plene di ardor, chiariade di pinsirs
La naf da l' amor miò va velizand;
Se l' aure de speranze e' va manchiand,
Sglonfe la vele il vint dai miei sospirs.
Ben la sorte clamà pò soreumane
Cului che un tant biel mar larà solcant;
E fortunat plui d' ogni navigant,
Se lis stelis dal front son tramontane.
Temerari nochier, tu che lontan
Ad un mar infedel fidis la vite,
E la sorte fedel de calamite
Sprezzis, oltrepassand vast ocëan;
A ce pro là cerchiand päis stranir
Par puartà maravëis al nestri mond;
Volte la vele in chest biel mar fecond
Di dut chel biel cu pò formà il pinsir.
Ha lu sen di chest mar l' avorio fin,
Tribute il Tago a lui l' arene d' aur,
Lis gemis cu pò dà l' Indo e lu Maur,
E la bochie prodùs perle e rubin.
Sirtis in lui non ha di crudeltat,
Nè di false sirene alete il chiant
Pericul dileteul al navigant
Nè di procelis mai si viod turbat.
Amor butimi in mar, e fa che 'o miri
Fate la tombe me il sol biel puart;
Che bëat mi dirai, siben che muart,
Pur che in sen di chest mar l' anime spiri.
Ad un suo Compare che gli aveva promesso d'andarlo a ritrovare in villa.
SONETTO
L'è passat ir, ir l' altri e anchie chest dì,
Copari chiar, che tu m' has promitut
Di jessi a Chiassà, e pur no t' hai vidut;
Dal to gran sta, no sài cè cu vul dì.
Jo pensi ben, no ti reuardis plui
Dai chiars tiei amìs, e ch' hai la cuur piardut
Par tant costant, e pur sòi rissolut
Fati cun chest Sunet un chi-va-lì.
Credilu, tu m' has dat un gran martir
A jessi stat di me cussì lontan,
Senza fami palès il to pinsir.
Ma zà lu sài; tu us fati miez furlan;
Tu us procurà di tirà il furistir,
Par avè di molài aduess il chian.
LAMENTO
DI UN' AMANTE INNAMORATO
C A N Z O N E
AMOR, crudel tiran, ce patiment
È chest che tu mi dàs di tant servì;
Donchie chest è il miò ben, chest il content
Che tu m' imprometès dopo il väì ?
Jò no ti hai fat pur mai un manchiament
Di crudeltat, no che tu no 'l puess dì;
Ah traditor! la me sincere fede
No meretave mai cheste mercede.
Quan che 'o crèdei di essi rivat in puart
Cu la me barchie fuur d' ogni travai,
Alore m'inquarzei, meschin! ma tart,
Che in miez dal mar 'o jeri plui che mai;
Anzi cussì dacîs fo la me muart
Che a nissun mud sciampàle 'o no porai:
Rot il tamon, e il vint a vele plene
A fracassà in t'un cret la barchie mene,
Lu miò ben, lu miò flat, la me speranze,
Cujè che in miez dal cuur puarti fichiade,
Cujè che di belezze, ogni altre avanze,
Fin mo' viars me; si è tant mortal mostrade;
Ahimè! chest al è ver, e non è cianze,
Quintri rason jè dut afat mudade,
E par un brisighel dal chiaf lizer
Disprezze l' amor miò perfet e ver.
E tu, savìnlu, Amor, tu lu patiss
E tu mi lassis fa un tal dispiet?
Siben che viars di me tant s'incrudiss,
Tu no t'incùris nuje, o maladet ?
Jò sòi rissolt biel sol cun un curtiss
Di complasè lu miò chiatif planet;
Jò mi trapassarai lu glutidor,
E cussì darai fin al miò dolor.
Jò murirai, che al no sarà cirot,
Che 'o vivi senze te, vite me chiare,
Al sarà cause chel to voli giot,
Che chel cu ti vul ben sarà sot tiare;
Ti prei almanc' quand che mi puartin sot,
Fami chest aplasè, cun qualchi amare
Lagrime suspirand, fami chest don,
Dimi: mal fortunat mador miò bon.
Ah! se tu no has pietat sin che sòi vif,
Speri che la me muart ta 'l farà fa
Jò meriti ogni mal, jò sòi chiatif:
Ma fuars di piès di me tu has di chiatà;
Tèntal pur a menz chel che 'o ti scrif,
Chel che ha di jessi no pò mai manchià;
Tu has di muarditi i dez, ahimè! di stizze,
E di russati là che a no ti pizze.
Orsù fai pur l' amor, dati solaz
Cun ogni sorte di int, cun ogni razze;
Jò no ten cont dai tuarz, che tu mi has faz,
Jò ti perdoni dut, bon pro ti fazze;
Tu no mi vedaràs plui di palaz
Vignind a pass a pass cun tal bonazze;
Ti larà fuur dai voi ben cheste spine;
Reste, che 'o muur cumò, reste sassine.
In lode di Filli.
SONETTO
LARE dal Ciart e deventà nature
Quand che volè formà Fili galant,
Tra lis sferis in cil salta in t'un quant,
E di robà il plui biel avè vinture.
A lis stelis chiolè la lus plui pure,
E chel voli i fasè cu è dut brilant;
Al soreli il splendor, e si dè vant
Di fabricà divine une fature.
A la vie latee alfin senze rispiet
Robà il candor, par fa, come se dìs,
Plui blanc de nef assai chel so biel pet.
Dute biele e galant dal chiaf ai pìs
Jè la formà dal ciart; anzi hai concet
Che un agnul vebi fat dal paradis.
Ad un suo amico.
CANZONE
CAPI, Copari! cheste sì che è grande:
Sintìt, se 'o sòi vignut mat di lëà:
Al mì è saltat umor' di pöetà,
E di fa viars insume d' ogni bande.
E pur jò cognoss clar, che cui cu ul dì,
Che il chiantà si confasi cu la muart,
Pò anchie ben dì, nè i vignarà dat tuart,
Che il ridi si confàsi cul väì.
La pöesie, che è simpri sûr di amor,
Usade in ta 'l bombas e in ta 'l solaz,
Pensait vo, se vorà mai chest impaz,
Di sta simpri cul nas sul cagador.
Lis Musis che in Parnass bordelizant
Van come il muss di mai fasind Chiavalis,
E no voran vignì fuur des sos stalis
A sintì lu puzzor di chèst miò chiant.
Cùris, servìzïai, e buliltins
,
Pastis di vissicanz, botis di fuuc,
Dongie missar Apolo non han luuc,
Nè mai si cordaran cui vïolins.
Se di chiantà donchie no puess, la part
Sostentà no conven e no pàr bon;
Lassarai sta, che no sòì tant minchion,
Di sta ustinat e dà panade a un muart.
Jò vajarai donchie, Copari chiar;
Väìt anchie vo, che ben podès väì,
Väit pur tas, jò us al torni a dì,
Che dopo il dolz al è vignut l'amar.
Lu mond al è distrut a man a man,
E al è in ogni part zà diformat,
E sìn pur trop riduz a di une etat,
Che il zituss puarte di Pandor in man.
La uere, da l'imperi cul Turcat
Mi fàs cun gran rason un mont pensà,
E se des voltis no la lassas sta,
E mi faress alfin deventà mat.
Lu vedè cussì ardit un sol lëon,
Rote la grene, e insanganat il chiaf,
No voltà fazze mai, ma di ver braf,
Ressisti in quintri a plui di un milïon.
Jò mi sgrisùli dut da chiaf a pìs,
Jò il viod e stenti a crèdilu par ver,
Che in ta 'l combati lui sei cussì fier,
Che al pàr un giat zujant cu lis surìs.
La uere, che dai Ress e' fo chiatade
Sol par jevà tante canaje al mont,
Se lìn däur a tignì ben il cont
Nus tajarà duquang come brüade.
..........................................
..........................................
..........................................
..........................................
Lu mond ven ogni dì pluì maladet,
E in pid cul timp di là quistand cerviel,
Fàs a la piès, e no l'impense un pêl,
Come se al foss un frut senze intelet.
La perfidie e rivade al plui no puess,
La caritat in lui non ha plui luuc,
J' ordenaris pechiaz e' si han par zuuc;
Poc plui si stime il mangià chiar o pess
Uceluz, culumbins faz cu l' agreste
Jere stimat un past di gardenal;
Ma cumò al non è piez di basöal,
Cu no ueli mangià di ste mignestre.
E un piez che jò us cognoss tas par giaton,
Tignut d' inzen sutil fin di fantat;
Mi dis sot vòs: e no sta a fa lu mat,
Che alfin ti avrà tochiat qualchi bocon.
Rispuind, che no sòi stat tan gof di man,
Cun vo jò o mi squind, o chiar dotor;
Varès cerchiat anch' vo d' ogni savor;
Che al baste dì che ses stat zarlatan.
Ma ma zà che avès tochiat là che mi dûl,
Us zuri in fede me di galanton,
Cul mal l' etat mi ha fat! alfin tas bon,
Che l'om fàs finalmentri ce che al vùl.
Ma lassìnle pur là; jò torni al fil,
E al mond che in ta 'l bultric al ha il lancuur;
Passat l' è il timp che ognun mostrave il cuur;
Ma cu l' assinz si ha messedat il mil.
Oh puare antighitat! quant mi rincress,
Che plui no sei lu timp, che un sol stival
Ben servive a dut quant il visinal,
E chè l' un l' altri s' imprestave il uess.
Cumò in dut il timp de nestre vite
La vere squele è sol lu malignà,
E al prossim nome il fross stìn a chialà,
E dut ce che al compagn hol in te cite.
Ognun a plui podè vul fà lu braf
Cul là tajand a chest e a chel zupons,
E no si aquàrzin mai ju puars minchions,
Che in te' lûs plui di ogn'altri han lu so traf.
L' invidie plui che mai in ogni lùc.
D' altri che dal mal d' altris no si giold;
Se qualchi püar om fàs qualchi sold,
A plui di quatri i ven il mal mazzuc.
In Zampis, in Pläìn e par duquant
Jere qualchi vilan tant bon paron;
Sul desc jere il persut e dal vin bon,
Dutis lis fiestis si steve balant.
Cumò in tes giambis han la code strete;
Sruculanju duquang in t' un sacuz,
Stèntin a saltà fuur quatri bezzuz
Par bevi la domenie la bozzete.
E par no m'in lassà schiampà une biele,
No ocor che il püar om fasi lu braf,
Parcè che ogni tantìn che al alzi il chiaf
Lu zintilom j' è aduess cu la mazzuele.
Oh miserie fatal di no' mortai!
Che väìnd e sberland vlgnìn e' lûs;
Nè cussì prest ha scomenzat il fûs
Cloto a filà, che sìn dug p1ens di mai.
Apene sin nassuz, che sin presons,
Apene si movin, che sìn lëaz,
Ju vers solaz e lis felicitaz
Interomp il rigor dai Satrapons,
Lu cors de nestre vite al è un bref sium
Plui prest di ogni tarlup al passe vie,
E' jè une barchie che no fàs mai sie,
E in miez dai vinz ardind jè une gran lum.
Ogni arbossat plui trist, e' jè pur vere,
Di avril rinzoveniss dal ciart ogn' an;
Ma in chest nestri infeliz bref cors uman
Si giold une sol volte Primevere.
Oh quang rancors, oh quantis lis passions
Oh quang son ju travais, quantis lis muarz !
La vite umane è un mar cu non ha puarz,
Nè mai sta senze vinz e senze tons.
Lu cervelat da l'om l'è simpri in mot,
In ajar fàs chischièi sere e doman,
Al strussie, al sude par vanzassi un pan,
Non ha un ore di ben nè dì nè gnot.
Al treme di päure, e simpri lest.
Al sta cun gran timor simpri in avis
Cu no i manchi la tiare sot i pis,
Nè al viod che al mond no sìn, se no ad imprest.
Temerari, arogant cun bref compass
Pretìnd di misurà la tiare e il cil,
E di savè quant è di Batro a Til,
E discori Epicicli e Paralass.
Ben spess par prevedè il ben e il mal
In cil al tèn ju voi fiss scocolaz,
E quand che al crod di vè felicitaz,
Misar! si romp il chiaf in t' un fossal,
Al no sa se al sei vif, o se al sei muart;
Sferis, misuris, riis e canochiai,
No' puèdin prevedè ju nestris mai,
Che no sàn ce cu sei nè dret nè stuart.
An d' è, che i agns intìrs cun un soflet
Stan simpri dongie il fuuc a distilà,
E quand che l' aur crèdin di ciart chiatà,
E' chiàtin robe cu no val un pêt.
Cun cerclis, cun temès e cun curdelis,
Cun laz di forchie e cun mil altris miez,
Pretind ognun savè fa dai strïez;
Sintìt se vès sintut mai di plui bielis.
Cun gran prudenze in ver, cun gran rason
Quatri ospedai al mond e' fòrin faz,
Sol par uarì cheste sorte di maz,
Cu la robe dal mestri di Neron.
L' ultin fo fat par chei che plens di fun,
Ma muarz in pis di fan e dug strazzaz,
No favèlin se no di antighitaz,
E pretìndin vignì di Lïonbrun.
Capi! mo a l' oress vè ben altri in cul
Se chest gran om tornass in cheste etat;
Capi! al si vedaress tas intrigat,
Che l'ultin no faress pa 'l so Frïul.
La robe al dì di uè jè il Giò da l' on;
Ad altri no si pense e no si chiale,
Nè si aquarzin che chest è un zuuc di bale,
Che uè l' ha in man Francesc, doman Simon.
E pur ce no si dìs ce no si fàs ?
Si crod eternamentri di sta al mont,
Di nissun' altre chiosse si ten cont,
Nè si sta un' ore benedete in pas.
Cun pochie caritat, manco coscienze
Ognun cumò vul fa lo merchiedant,
Al pizzighe un pocut anch' dal furfant;
Ven dat dal mond a dug buine licenze.
L' usure jè in gran stime cà di no',
An d' è, che senze meti il chiapiel ross,
Par fa assai bez, no stimaran un fross,
Di scomenzà dal trente in non di Giò.
Lu tosà l' agnelut cun discrezion
Jere stimat mistìir di gran cerviel;
Cumò a sbranàlu no si pense un pel;
Cridi pur sin al cil il püar on.
Ognun in conclusion si met e' fuart,
E par fa robe al dopre man e pid;
Ma in tant che di chesg maz il cil s' al rid,
Ven la comedie a disgropà, la muart.
Ma volèso plui stramb, plui prif di ment?
Pretìnd anch' dopo muart jessi paron,
E sol par meti il mond in confusion,
Ha chiatat l'invenzion dal testament.
............................................
............................................
............................................
............................................
Jò no la puess tasè, che mi pàr dure,
Sol par zupà lu sanc dal püar on,
Senze vedè se al ha tuart o reson
L'avocat e il notar fasin congiure.
Jò faveli cun vo, ma no di vo,
Che vo ses ben dotor, ma no avocat,
Vo ses un gran cerviel, un leterat
Tra i majors che mai sein staz cà di no'.
Podès sta sald a ognun cu sei d' inzen,
Vo ses in dut non sol infarinat,
Ma in dutis lis scïenzis ben fondat,
E sore il dut vo ses un om da ben.
Lu miedi è un traditor, boje cuviart;
Che quand che par sïur il puar malat
Al dìs di dalu fra poc liberat,
Ben spess in chiase i fàs vignì la muart.
An d' è cu no cognoss nè unzint nè jarbe,
E pretìnd di uari qual si sei mal,
E chiaminand cun pass pontifical,
Stìmin che il medëà al stei te' barbe.
Ma cu cheste concori a medëà
Pensi e ripensi, alfin no sai parcè,
Che puedi jessi buine, se non jè
Di netassi il martin dopo il cagà.
................................................
................................................
................................................
................................................
Lis sentinelis, rondis, lu squadron
Lis pichis, lu tambur e lu moscbet,
Lis minis, lu canon e il mortalet
Ven stimat un mistir di bon minchion.
Oh ! quant, oh ! quant diviarse da sè stesse
Si viod, ohime! se dai siei biei princìpis
Incontrà pa' l' onor ju precipìzis
Fo dai bogn viei stimat tant che une vesse.
Lu sa la Fiandre cu la basse Olande,
Lu Svedès, lu Todesc pur trop lu sàn,
Che vidut a plovè dal bon Furlan
Han lu sanc glorïos par ogni bande.
Deh ! raviòditi omai, su al gran acquist,
Su su, si eclissi omai l' arme Otomane
A l' arme, a l' arme a plui podè ti clame
La patrie, l' onor to, l' onor di Crist.
Ma zà che lu tignì la spade in man
Poc plui si use, e poc al ven stimat;
Mo almanco si vedess in cheste etat
Un Màntiche, un Otelio, un' Decïan.
Son dos etaz cu ten la lanze in reste
La chiase Caime inver cun gran valor
Ma prest al finirà anch' chest onor,
E dopo chest no' vìn finìt la fieste.
Jò sai, che plui di quatri biei umors
A plui podè e' tignaran cridat:
Ce diaul ustu cu sei plui biel merchiat,
Che al dì di uè di conz e di dotors ?
Jò faveli cun cui cu lia sal in zuche
Cu sàn che il dotorà, rio fàs dotors;
Cui cu ha nas sa distingui dug ju odors,
Cognossi i vers chiavei vie de piruche.
Jò no nomini Pauli over Michel,
An d' è ehe cun gran fum si tìgnjn su,
E discòrin de Chine e dal Perù,
Nè han vidut il Cormor fuur dì Pusquel
No' voress dotoraz, ma dotors vers
Umin di potè sta in taule tonde,
Cerviei di une gran scienze alte, profonde,
Come che avìn il cavalìr di Pers.
Dìsi pur lu malign dut ce che al ul
Che si slambri l' invidie il pet e il cuur.
Che dèi a plui podè dal chiaf ta 'l mûr,
Che lui è lu soreli dal Frïul,
Ma sintìmi di grazie; in grazie us prei,
Lassait a chiase un poc ju fantulins,
E fait doi pass fin là dai siors Tunins,
Riverìt a miò non chei doi gran viei.
Lor doi son lis coloniis dal päìs,
Lu f1or, l'estrat de gran cavalarìe;
Jò lu dìs clar, e non è frenesìe,
Lor doi son ju Catons dai nestris dìs.
E vo ce staiso, a fa senze chiantà,
Avind in pöetà salde la vene ?
Su po vie, dait di man e' uestre pene,
E ritiràisi un poc sin a Freelà.
Oh ! quante dolce invidie, che jò us hai
Di no podè sta un mes lassù cun vo,
E fa dai chianz a plui podè fra no',
Fasind te' jarbe tombulis chest maj.
Sinti lu rusignuul e la cisìle,
La favite, lu scriz e il re-pipin,
Lu lujar, lu franzèl e il gardelin,
Là dut il dì chiantand par dut la vile.
Crèdimal, che altri al mond no' vìn di bon,
Che 'sta plui che si pò fuur dai rumors;
Lis grandezziz, la robe e dug ju onors
Son la crôs, lu flagel dal misar on.
Oh !quant gust l'è il gioldè un poc di ortuz,
Avè une vachiuzze e quatri pioris,
Mangià quatri chistìnis sot lis boris,
Un raf, un rati sol cun un miluz,
Altri' cu avè pernìs simpri e fasan,
Ostrighis, granciporos, sturïon,
Stufassi dal vidiel e dal chiapon,
Nè mai savè di cè savor cu è il pan.
E chest è chel cu fàs vignì la fiere,
La smilze, lu catàr, l' idropisìe,
E ogni sorte alfin di malatìe,
La gote, la renele e il mal di piere.
Al stente, al strussie, al sude il puar vilan,
L' Unviar, la Primevere e 'dut l' Istat,
Al ven la sere a chiase squanquassat,
Ma al è san, come un pess in ta 'l doman.
L' è püar sì, ma ogni dì jò impari,
Che al è assai bonat e assai sincer,
Che al è om senze gasi, e a dì lu ver,
Al saress om daben se al no foss lari.
.........................................
.........................................
.........................................
.........................................
Apolo in vile sta simpri chiantand,
In vile sta Diane cu i siei chians,
Amor sta vulintìr fra ju vilans,
E Giove in vile in bò va vie saltand.
Jò us fevèli clar, e us e' dìs nete,
Chel poc, cu manchie di sta in chest mondaz
Jò uei paràlu vie senze vè impaz,
Uei ciart finìlu a sante Margiarete.
Lassù cun poc disturb e pochie spese
L' è simpri il colombin e lu chiapon
Gioldind simpri lu vin fuur dal chialcon,
Senze sta a fa pe' setemane mese,
Un vistìt sol al fàs par plui di un an,
Al è simpri a la mode, e simpri al si use;
Chistìnis e piruz son a rifuse;
Nè mai manchiarà ciart un bez di pan.
E se il cas puartarà che 'o sei malat,
Midisine no uei, nè servizial;
Uei dà une gran tirade di bocal,
Che al stei pur tant che al ul il chiaf lëat
Vadi la speziarìe dute in malore;
Sirops, aghis, cordiai e confezions,
Pìrulis, pitarez, cassie in bocons,
L'è chel cu fàs muri denant da l'ore.
E quand che fuur di cheste aspre preson
L'anime sarà lade al Crëator,
Cun une chiandeluzze e un monsignor
Bastarà dal segrat un sol chianton.
Lis torzis, chiandeloz in quantitat,
Lis archis, catafalcs e lu goton
Son la major pazzìe cu fasi l' on,
E son l' ecess di ogni bestialitat.
Cheste moralitàt, che a vo us mande
La strambe Muse, vo no disdegnat,
Scusaile, che non ha mai plui chiantat,
E atribüìlu a confidenze grande.
E se par sorte fossin dai smurgnons,
Che a chest chiant, e' volessìn alzà il nas,
Faju put tasè là, faju sta in pas,
Che in Parnass si säete anchie i Pitons.